माधव नारायणका मेयर बैजनाथ यादवविरुद्ध अख्तियारमा उजुरी
रौतहटको माधव नारायण नगरपालिकाका मेयर बैजु यादवविरुद्ध अख्तियार दुरुपयोग अनुसन्धान कार्यालय हेटौंडामा उजुरी परेको छ।
मेयर यादवसहित जिम्मेवार कर्मचारीहरूको संलग्नतामा करोडौं रूपैयाँको चलखेल भएको भन्दै नेकपा (माओवादी केन्द्र)का माधव नारायण नगर कमिटी अध्यक्ष देव नारायण भगतले छानबिनको माग गर्दै अख्तियारमा उजुरी दर्ता गराएका हुन् ।
मेयर यादवले मनपरी बिल पेस गर्ने, हरेक काम कारबाहीमा भ्रष्टाचार, अपार्दशी , मनमौजी किसिमले आर्थिक चलखेल गरेको देखिन आएकोले छानबिनको लागि उजुरी दिएको अध्यक्ष भगतले बताएका छन ।
माधव नारायण नगरपालिकाको आम सचेत नागरिक, संचारकर्मी, प्रशासनिक निकायको संयुक्त पहलमा मेयर र कर्मचारीले आपराधिक मानसिकतामा बिल बजेटको फाइल लुकाएर चोरी भएको आरोप लागेको अवस्थामा गत १ गते इलाका प्रहरी कार्यालय गरूडाबाट खटेर आएको प्रहरी टोलीले नगर कार्यपालिकाको कार्यालयबाट उक्त फाइल बरामद गरेको थियो ।