एमालेसँग सरकार बनाइहाल्ने गरी संवाद भएको छैन : लेखक
नेपाली कांग्रेसका प्रमुख सचेतक रमेश लेखकले कांग्रेस र एमाले मिलेर सरकार बनाउने विषयमा ठोस सम्वाद नभएको बताएका छन् ।
तर आम नागरिकमा जस्तै दुबै दलभित्र पनि मुलुकमा धेरै स्थिरता भएकाले ठूला दलहरु मिलेर सरकार बनाउने हो कि भन्ने धारणा रहेको उनले बताए । बुधबार सञ्चारकर्मीहरुसँग कुरा गर्दै प्रमुख सचेतक लेखकले राजनीतिक दलहरुबीच वार्ता र सम्वाद हुन स्वभाविक भएपनि आफूहरु अहिले नै समीकरण भत्काउन नहतारिएको बताए ।
एमालेसँग मिलेर सरकार बन्छ कि भन्ने प्रश्नमा उनले भने, ‘यसका बारेमा कुनै ठोस सम्वाद भएको छैन । एमालेसँग बसेर औपचारिक अनौपचारिक रुपले अब सरकार बनाऔं, यसरी बनाऔं भनेर सम्वाद भएको छैन ।’
नागरिकमा जस्तै कांग्रेसभित्र र एमालेभित्र पनि धारणा रहेको हुनाले बेलाबेला सरकार बनाइहाल्ने हो कि भन्ने जसरी प्रकट हुने गरेको उनले बताए । कांग्रेस प्रमुख सचेतक लेखकले भने, ‘सरकार बनाइहाल्नेसम्म वार्ता सम्वाद भएको छैन ।’
तर ठूला राजनीतिक दलहरुका बीचमा केही विषयमा निरन्तर सम्वाद र सहकार्य हुनुपर्ने उनको भनाइ छ । शान्ति प्रक्रिया, संविधान निर्माण सबै सहमतिमा सम्भव भएको भन्दै नेता लेखकले भने, ‘संविधान जारी भएको ८ वर्ष भइसक्यो । संविधान आफैंले केही विषय १० वर्षमा रिभ्यू गर भनेको छ ।’
संविधानको अभ्यास गर्ने क्रममा केही जटिलता देखिएकाले यसको समीक्षा गर्नुपर्ने उनले बताए । अन्तर्राष्ट्रिय सम्बन्ध, सुशासन लगायतमा पनि प्रमुख दलहरुबीच निरन्तर सम्वाद हुनुपर्ने कांग्रेस प्रमुख सचेतक लेखकको जोड छ । – अनलाईन खबर