अर्को शताब्दीसम्ममा पृथ्वीको उष्णकटिबन्धीय क्षेत्र खतरनाक तापक्रमको चपेटामा पर्ने चेतावनी
हार्वर्ड युनिभर्सिटीका प्रमुख लेखक लुकास भार्गास जेपेटेलोका अनुसार विश्वले एकसाथ कार्बन उत्सर्जन घटाउनेतर्फ काम गर्न नसक्ने हो भने अर्बौँको सङ्ख्यामा मानिसहरु खतरनाक तापक्रमको चपेटामा पर्नेछन् ।
जलवायु परिवर्तनका कारण अत्यधिक गर्मी हुन थालेको र यसले मानव स्वास्थ्य, वन्यजन्तु र बालीनालीको उत्पादनलाई अहिलेदेखि नै खतरामा पारिरहेको अध्ययनको निष्कर्ष छ । अफ्रिका र भारत विशेष गरी जोखिममा रहेको पाइएको प्रतिवेदनलाई उल्लेख गरी समाचार संस्था एएफपीले जनाएको छ ।
‘कम्युनिकेशन अर्थ एन्ड इन्भाइरोमेन्ट जर्नल’ मा प्रकाशित अध्ययन प्रतिवेदनमामा अनुसन्धानकर्ताहरूले खतरनाक गर्मी र आर्द्रताकाे सम्भावित जोखिमको समेत अनुमान गरेका छन् ।
उनीहरुले ३९ दशमलव ४ डिग्री सेल्सियस तापक्रमलाई ‘खतरा’ भनेका छन् । त्यस्तै ५१ डिग्री सेल्सियसभन्दा माथिको तापक्रमलाई ‘अत्यन्तै खतरनाक’ र मानिसका लागि पूर्ण रूपमा असुरक्षित मानिएको छ।