पहिरोका कारण अवरुद्ध मध्यपहाडी लोकमार्ग सुचारु

मंगलबार साँझदेखि लगातार परेको वर्षाका कारण ठाउँ ठाउँमा अवरुद्ध बनेको पुष्पलाल मध्यपहाडी लोकमार्गको पर्वत खण्ड सुचारु भएको छ । पर्वतको कुश्मा नगरपालिका वडा नं. ८ स्थित तमादीखोला, दोविल्ला र मोदी गाउँपालिका वडा नं. ५ बाजुङ स्थित भ्याप्लेमा सडक माथिबाट खसेको पहिरोका कारण गएराती देखि नै अवरुद्ध सडक सुचारु भएको हो ।

तमादीखोला र सुन्दरेखोलामा आएको बाढी र भ्याप्लेमा भिरबाट खसेको पहिरोले सडक अवरुद्ध भएको थियो । तीन वटै ठाउँको पहिरो पन्छाएर यातायात सुचारु गरिएको जिल्ला ट्राफिक प्रहरी कार्यालय पर्वतका प्रमुख सुमन न्यूरेले जानकारी दिनुभयो । सडक अवरुद्ध हुँदा अलपत्र परेका सवारीसाधन तथा यात्रुहरु गन्तव्यतर्फ लागेका छन् ।

पर्वत, बागलुङ, म्याग्दी र मुस्ताङवाट अन्यत्रका लागि छुटेका र अन्यत्रबाट धौलागिरिका चार जिल्लाका लागि आएका सवारीसाधन तथा यात्रुहरु गन्तव्यतर्फ लागेको प्रहरीले जनाएको छ । गत वर्ष मात्रै निर्माण सम्पन्न भएको मध्यपहाडी लोकमार्गको पर्वत खण्डमा सामान्य वर्षा हुँदा समेत सडक अवरुद्ध हुने गरेको छ ।