कोरोना सङ्क्रमित भेटिएसँगै वीरगञ्ज-रक्सौल नाकामा उच्च सतर्कता
भारतमा कोरोना सङ्क्रमण बढेसँगै नेपालमा पनि उच्च सतर्कता अपनाइएको छ । नेपालको मूख्य प्रवेशद्वार वीरगञ्ज–रक्सौल नाकामा कोरोना परिक्षणलाई तिब्रता दिँदै सतर्कता बढाइएको हो ।
वीरगञ्ज नाकामा हेल्थ डेस्क स्थापना गरेर भारतबाट आउनेहरुको दैनिक परिक्षण भइरहेको छ । परिक्षणका क्रममा बिहिबार दुईजना भारतीय नागरिकमा कोरोना सङ्क्रमण पुष्टि भएको हेल्थ डेस्ककी प्रमुख डा. अनिषा महतोले बताइन् ।
डा. महतोकाअनुसार भारतको पश्चिम बङ्गालस्थित कलकत्ताबाट आएका पर्यटकहरुमध्ये दुईजनामा र्यापिड टेस्ट प्रविधिबाट परिक्षण गर्दा कोरोना पुष्टि भएको हो । सङ्क्रमण पुष्टि भएकाहरुमा कोरोनासँग मिल्दोजुल्दो कुनै लक्षण नदेखिएपनि पिसिआर परिक्षण गर्ने परामर्श दिएर उनीहरुलाई पुनः भारत नै फिर्ता पठाइएको डा. महतोले बताइन् ।
भारतबाट आउने पर्यटक र लामो समयसम्म त्यहाँ बसेर आएकाहरुको प्राथमिकताका साथ परिक्षण भइरहेको उनले बताइन् । उनकाअनुसार दैनिक साढे ३ सयदेखि ४ सय जनासम्मको परिक्षण हुने गरेको छ । ‘टुरिस्ट सिजन भएकोले भारतबाट आउने पर्यटकहरु अहिले हाम्रो मेन टार्गेटमा छन् । उनीहरु आउने बस, गाडीलगायतका सावारीसाधनमा सवार सबैको र्यापिड टेस्ट गर्दैछौं,’ उनले भनिन्, ‘त्यसपछि त्यहाँ बसेर आएका कामदार, विद्यार्थीलाई हामीले टार्गेट गरेर परीक्षण गरिरहेका छौँ ।’
त्यस्तै भारतका विभिन्न ठूला शहरबाट रक्सौल आउने ट्रेनका यात्रुहरुलाई परिक्षणको दयारमा ल्याउने प्रयास भइरहेको उनले बताइन् । पछिल्लो पटक कलकत्ताबाट आएका पर्यटकमा सङ्क्रमण पुष्टि भएकोले त्यहाँबाट दैनिक रक्सौल स्टेसनसम्म आउने मिथिला एक्सप्रेसका यात्रुहरुको पनि परिक्षण प्राथमिकताका साथि भइरहेको छ ।
भारतमा दनाहुँ हजारौंको सङ्ख्यामा सङ्क्रमित भेटिन थालेपछि पछिल्लो समय तिन दिनभन्दा बढी भारतमा बसेर फर्किनेहरुको चेकजाँचमा पनि कडाई गरिएको डा. महतोको भनाई छ । हाल दैनिक रुपमा भारत–नेपाल आवतजावत गर्नेहरुलाई भने परीक्षणका लागि प्राथमिकतामा नराखिएको उनले बताइन् ।
बिहिबार दुईजना भारतीयमा सङ्क्रमण पुष्टि भएसँगै आफूहरु थप सतर्क भएको उनले बताइन् । ‘दुईजना कोभिड पुष्टि भएको मतलब नेपालमा कुनैपनि समय ओमिक्रोनको नयाँ भेरीएन्ट प्रवेश गर्न सक्छ । सङ्क्रमणलाई नेपाल प्रवेश गर्न नदिन हामी सतर्क छौँ । परिक्षणको दायरा पनि फराकिलो पार्ने प्रयास गरिरहेका छौँ,’ उनले यात्राडेलीसँग भनिन् ।
नेपालीहरुमा र्यापिड टेस्ट गर्दा सङ्क्रमण पुष्टि भए पिसीआर परिक्षणको स्वाब सङ्कलन गर्ने किटसमेत व्यवस्था गरिएको छ । स्वाब सङ्कलन गरेर थप परिक्षणको लागि नारायणी अस्पताल पठाइने र सङ्क्रमितलाई आइसोलेट गर्ने तयारी रहेको उनले जानकारी दिइन् ।
नेपालमा पनि कोरोना सङ्क्रमितहरुको सङ्ख्या उकालो लाग्दै छ । सून्यमा झरेको सङ्क्रमितको सङ्ख्या पछिल्लो समय दुईदेखि तिन अङ्कसम्म पुग्ने गरेको स्वास्थ्य तथा जनसख्या मन्त्रालयको तथ्याङ्कले देखाएको छ । सोमबार मात्रै १०४ जनामा सङ्क्रमण पुष्टि भएको छ भने एकजनाको मृत्यु भएको छ ।