सहिद परिवारलाई राहत
धनुषा — मधेस प्रदेश सरकारले मधेस आन्दोलनका क्रममा सहिद भएकाका परिवारलाई नगद २ लाख रुपैयाँसहित सम्मान गरेको छ । मधेस आन्दोलनको क्रममा माघ ५ गते सिरहाको लहानमा रमेश महतोको मृत्यु भएको दिनलाई यहाँ बलिदानी दिवसका रुपमा मनाइन्छ । प्रदेश सरकारले उक्त दिवसमा बिहीबार प्रदेशमा सार्वजनिक बिदा दिएको थियो ।
प्रदेश सरकारले ८ वटै जिल्लाबाट आएका सहिदका परिवारलाई कम्मलसहित २ लाख रुपैयाँको चेक प्रदान गरेको थियो । मधेसी सहिद प्रष्ठिानले आयोजना गरेको कार्यक्रममा ६१ सहिदका परिवारलाई कम्मलसहित २ लाख रुपैयाँ उपलब्ध गराएको छ । मधेस प्रदेशका बिनाविभागिय मन्त्री संजय यादवले सहिदका परिवारलाई रकम हस्तान्तरण गरे ।
कार्यक्रम स्थलमा मधेस आन्दोलनमा घाइतेहरूले प्रदेश सरकारको विरोधमा प्रदर्शनसमेत गरे । घाइतेहरूलाई सरकारले सम्बोधन गर्न नसकेको उनीहरूको आरोप थियो । सहिद प्रतिष्ठानले मधेस प्रदेशका सहिदका परिवारलाई भरणपोषणका लागि मासिक २० हजार रुपैयाँ उपलब्ध गराउने निर्णय गरे पनि अझैसम्म कार्यान्वयन हुन सकेको छैन ।