पश्चिम सेती परियोजना निर्माण गरेरै छोड्छौँ : अध्यक्ष ओली
नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले सात सय ५० मेगावाटको पश्चिम सेती जलविद्युत् परियोजना निर्माण गरेरै छाड्ने बताउनुभएको छ । नेकपा एमाले डोटीले आज शनिवार दिपायलमा आयोजना गरेको बृहत् चुनावी आमसभालाई सम्बोधन गर्नुहुँदै उहाँले पश्चिम सेती परियोजना विभिन्न राजनैतिक कारणले बन्न नसके पनि अब बन्ने एमालेको सरकारले त्यो निर्माण गरेरै छोड्ने दाबी गर्नुभयो ।
यस्तै ओलीले डोटीको सिलगढीमा रहेका विद्यालयमा विभिन्न विषयका प्राविधिक विषयहरुको पढाइ सुरु गरिने बताउनुभयो । त्यसैगरी उहाँले दुई वर्ष भित्रमा सबै बालबालिकालाई विद्यालय पुर्याउने एमालेको लक्ष रहेकाले बालबालिकाले विद्यालय छोड्नुपर्ने अवस्थाको अन्त्य गरिने बताउनुभयो ।
त्यसैगरी उहाँले पूर्व पश्चिम हुलाकी राजमार्ग र महाकाली करिडोर पनि एमालेले नै बनाएकाले मदन भण्डारी राजमार्गको सुरुवात पनि एमालेले नै गरेको र लगभग त्यस कामको अन्त्य हुने अवस्थामा रहेको उहाँकाे भनाइ थियाे ।
त्यसैगरी पुष्पलाल मध्यपहाडी राजमार्गको सुरुवात एमालेले नै गरेको र त्यसको निर्माण कार्य लगभग सकिएको उहाँको जिकिर गर्नुभयाे । त्यस्तै सुकम्वासी समस्या समाधान गर्ने कुरा एमालेले नै उठाएकाले त्यसको समाधान आफूरुले नै गर्ने उहाँको दाबी थियो ।
एमालेको ४१ महिने कार्यकालमा सडक, विद्युत्, विमानस्थललदेखि थुप्रै विकासका कामहरु भएकाले एमाले देश विकासका लागि सधैँ अग्रपङ्तिमा रहेको दाबी पनि उहाँले गर्नुभयो । कार्यक्रमको अन्त्यमा उहाँले ओलीले सबै राजनैतिक दल, नेता तथा कार्यकर्ताहरुले विना पूर्वाग्रह राष्ट्र निर्माणको काममा लाग्नुपर्ने बताउनुभएको छ ।