नेपालीसहित ९ लाख ९५ हजार कामदारका लागि मलेसियाद्वारा कोटा प्रमाणीत

मलेसियाले जनवरीदेखि मार्च १८ सम्म नेपालसहित १५ वटा श्रोत देशबाट ९ लाख ९५ हजार तीन सय ९६ जना विदेशी कामदार ल्याउने कोटा प्रमाणीत गरेको छ । तर नेपालको लागि मात्रै अलग्गै कोटा भने छुट्टाइएको छैन । यद्यपि मलेसियाका लागि नेपाल प्रमुख स्रोत देश मानिन्छ ।

मलेसियाले सुरक्षा गार्डका लागि मात्रै नेपालका लागि कोट छुट्ट्याउने गरेको छ । पछिल्लो ८ महिनाको अवधिमा मलेसियाका लागि १ लाख ७४ हजार ९३८ जनाले नयाँ श्रम स्वीकृति लिएका छन् ।

मलेसियाले यी क्षेत्रमा कामदारको अभाव भएको भन्दै श्रोत देशबाट कामदारलाई भर्ना गर्न रोजगारदातालाई अनुमति दिएको हो । मलेसियाले गत जनवारीदेखि यी क्षेत्रमा कामदार भर्ना गर्न फरेन वर्कर इम्प्लोइमेन्ट रिल्याक्सेसन प्लान (एफडब्लुइआरपी) कार्यक्रम लागू गरेको थियो । कोटा प्रमाणीत गरे अनुसार रोजगारदाताहरुले कामदार भर्ना प्रक्रियालाई ढिला गर्न थालेपछि आइतबार (चैत ४) देखि नयाँ कोटा प्रमाणीत गर्ने कार्य भने रोकिएको छ । ‘कोटा प्रमाणीत अनुसार कामदार ल्याउने कार्य भने सुस्त छ । यो समयमा रोजगारदाताले आफूले पाएको कोटा अनुसार तीव्र गतिमा भर्ना गर्नुपर्छ’, मानव संशाधन मन्त्री भी शिवकुमारले आफ्नो विज्ञप्तिमा उल्लेख गरेका छन् ।

मलेसियाका लागि नेपाली राजदूत डिल्लीराज पौडेलका अनुसार मलेसियाले देशगत आधारमा कामदार ल्याउने कोटा तोक्ने गरेको छैन । ‘झन्डै १० लाख कोटा छुट्टाइएको छ । त्यो १५ वटा श्रोत देशको लागि नै खुला छ’, राजदूत पौडेलले भने,‘नेपालको लागि सुरक्षा गार्डको क्षेत्रमा मात्रै सुनिश्चित गरिएको छ । हामीले नेपालको लागि छुट्टै कोटा प्रमाणीत गर्न पहल गरिरहेका छौं ।’

उनले सरकाबाट कोटा प्रमाणीत भए पनि रोजगारदाताले आफू अनुकुल कामदार भर्ना गर्ने अवस्था रहेको बताए । ‘कोटाको म्याद दुई वर्ष हुन्छ । त्यो समयभित्र जहिले ल्यायो पनि भयो,’ उनले भने,‘पछिल्लो समयमा जसरी कोटा प्रमाणीत भइरहेको छ, त्यसरी कामदार ल्याइएको छैन । नेपालमा धेरै रोजगारदाताले छनोट गरीसकेका कामदार पनि अहिले होल्डमा छन् ।’

पछिल्लो तीन महिनामा नेपालबाट कामदार ल्याउन १२ सय २९ वटा कम्पनीले नेपाली दूतावासमा मागपत्र प्रमाणीत गराएका थिए । त्यसअघिको तीन महिनामा भने ४५ सय ३७ वटा कम्पनीले मागपत्र प्रमाणीत गरेका थिए ।

आर्थिक मन्दीका कारण मलेसियाको उद्योगमा उत्पादनमा कटौती गरिरहेको छ । कामदारहरुले नियमीत ड्युटी (आठ घण्टा) मात्रै दिइरहेको छ । ओभरटाइम दिइएको छैन । मलेसियामा न्यूनतम तलबवापत १५ सय रिंगेट र ओभरटाइमवापत करिब ८ सय ४३ रिगेट गरी २३ सय ४३ रिगेट (करिब ७० हजार रुपैयाँ) पाउने भन्दै नेपाली कामदारको आकर्षण छ ।